Af hverju gef ég?

Ulf Bingsgård, ráðgjafi um stórframlög til Rótarýsjóðsins, bað mig að flytja erindi um mikilvægi framlaga á viðburði sem haldinn var í tengslum við Rotary Action Summit í Palanga.

Erindið átti að vera persónulegt og svara einni einfaldri spurningu: Hvers vegna gef ég?

Mér fannst spurningin í raun dálítið fáránleg – með fullri virðingu fyrir Ulf – því ég er rótarýfélagi og mér finnst það sjálfsagður hluti af því að vera í Rotary að láta gott af sér leiða.

Þess vegna fannst mér svar rótarýfélagans Lars Borgestrand við sömu spurningu fyrir tveimur árum einstaklega hnitmiðað og vel til fundið: „Af því að ég get það.“

Ég lít á mig sem ósköp venjulegan styrktaraðila, en mér finnst einfaldlega ánægjulegt að gefa. Í hvert sinn sem ég læt eitthvað af hendi rakna líður mér vel. Kannast þú ekki við þá tilfinningu?

Ætli megi því ekki segja að ein ástæðan fyrir því að ég gef sé sú að ég sé orðinn háður því! Og rétt eins og með aðra ávanabindandi hegðun þarf eitthvað að kveikja áhugann – einhvers konar fyrsta skammt.

Að gefa er gefandi á marga vegu

Þegar ég gekk til liðs við Rotary fyrir sextán árum lagði Seija Aimo, sem studdi inngöngu mína í klúbbinn, ríka áherslu á mikilvægi þess að leggja góðum málefnum lið.

Skömmu eftir inngöngu mína varð ég forseti klúbbsins og ákvað að við skyldum ráðast í alþjóðlegt styrkverkefni (Global Grant). Til að styðja við verkefnið ákváðum við Seija að leggja hvort um sig að minnsta kosti 1.000 Bandaríkjadali árlega til Rótarýsjóðsins. Sú ákvörðun var því í upphafi fyrst og fremst tekin af hagnýtum ástæðum.

Verkefnið varð að veruleika og sú reynsla sannfærði mig um að framlögin nýttust sannarlega til góðra verka.

Á síðustu árum hefur þó bæst við önnur og enn sterkari ástæða fyrir því að ég gef: Friður.

Þegar náttúruhamfarir eða aðrar hörmungar dynja yfir er eðlilegt og skiljanlegt að við viljum bregðast við, rétta hjálparhönd og leggja okkar af mörkum. Líkja má slíkum hörmungum við blæðandi sár. Fyrsta verkefnið er að stöðva blæðinguna og veita nauðsynlega aðstoð. Neyðarhjálp snýst einmitt um það og mikilvægi hennar verður seint ofmetið.

En við þurfum líka að huga að því hvernig koma megi í veg fyrir að sárin myndist yfirleitt.

Þar koma áherslusvið Rótarýsjóðsins til sögunnar. Með verkefnum á þeim sviðum er unnið að því að draga úr þeim aðstæðum sem geta leitt til átaka, ófriðar og mannlegra hörmunga.

Í hverju slíku verkefni felst því einnig framlag til friðar. Verkefni Rotary stuðla að sterkari samfélögum, auknum skilningi og betri lífsskilyrðum. Þannig má draga úr hættu á átökum og koma í veg fyrir að ný sár myndist.

Ég er sannfærður um að hvert framlag sem ég læt af hendi sé liður í því að byggja upp frið. Hvert framlag skapar rótarýklúbbi einhvers staðar í heiminum tækifæri til að vinna að verkefni sem getur skipt sköpum fyrir einstaklinga og samfélög.

Og þar með er svarið við spurningunni um hvers vegna ég gef í raun einfalt:

Ég gef vegna þess að það veitir mér ánægju – og vegna þess að með því að gefa legg ég mitt af mörkum til að byggja upp frið.